Super Fit ប្រមូល​អ្នកលេង​កីឡា​មក​បរិច្ចាគ​ឈាម ជួយ​ជន​រងគ្រោះ

ភ្នំពេញៈ មជ្ឈមណ្ឌល​កីឡា Super Fit រួម​ជាមួយ​ដៃគូ​សហការ ៣ ក្រុមហ៊ុន​ទៀត បាន​ប្រមែ​ប្រមូល​អ្នកលេង​កីឡា គ្រូបង្វឹក ថ្នាក់​ដឹកនាំ និង​បុគ្គលិក​សរុប ៤៤ នាក់ មក​ធ្វើការ​បរិច្ចាគ​ឈាម​ឲ្យ​មជ្ឈមណ្ឌល​ជាតិ​ផ្តល់​ឈាម នៅ​ទីស្នាក់ការ Super Fit ស្ថិត​ក្នុង​បរិវេណ​ផាកវ៉េ កាល​ពី​ព្រឹក​ថ្ងៃ​អង្គារ ដើម្បី​ចូលរួម​ជួយ​ដល់​សង្គម ខណៈ​មន្ត្រី​ផ្នែក​ទំនាក់​ទំនង​របស់​មជ្ឈមណ្ឌល​ជាតិ​ផ្តល់​ឈាម បាន​ប្រាប់​ថា ក្នុង​មួយ​ថ្ងៃៗ​ត្រូវការ​ឈាម ២០០ ប្លោក សម្រាប់​ជួយ​ដល់​អ្នកជំងឺ និង​ជន​រងគ្រោះ។
លោក ខៀវ សំរិទ្ធ អ្នកគ្រប់គ្រង​ទូទៅ​របស់​មជ្ឈមណ្ឌល​កីឡា Super Fit បាន​ថ្លែង​ថា៖ «កម្មវិធី​បរិច្ចាគ​ឈាម​នេះ ត្រូវបាន​ផ្តួចផ្តើម​ឡើង​ដោយ Super Fit ដោយ​មានការ​ចូលរួម​សហការ​ពី Spark Kafee, Spark&Tawandang Microbrewery និង​សាលារៀន​តិចសាស្ត្រ រួម​ជាមួយ​ម្ចាស់​ឧបត្ថម្ភ​មាន ស្ពនស័រ Red Bull ផ្សារ​ផ្លែឈើ និង​ទឹកអប់ Morakot ព្រោះ​យើង​ចង់​បរិច្ចាគ​ឈាម​ទៅ​ដល់​ជន​រងគ្រោះ ដែល​គាត់​កំពុង​ខ្វះ​ឈាម ពិសេស​ជន​រងគ្រោះ​នៅ​តាម​ខេត្ត ឬ​ទី​ដាច់ស្រយាល ដែល​គ្មាន​លទ្ធភាព​ស្វែងរក​ឈាម»។
ជាមួយ​ការគិត​ដល់​សុខទុក្ខ​ជន​រងគ្រោះ មជ្ឈមណ្ឌល​កីឡា Super Fit ដែល​ជា​កន្លែង​ហាត់ប្រាណ​បែប​ទំនើប​ទាំង​ផ្នែក​កម្លាំង រាងកាយ និង​សាច់ដុំ ហើយ​ជាទី​តាំង​ហ្វឹកហាត់​ផ្នែក​រាងកាយ​ដ៏​ពេញនិយម​របស់​ក្រុម​បាល់ទាត់​ ជម្រើសជាតិ​កម្ពុជា និង​ក្លិប​ក្នុង​ស្រុក​មួយ​ចំនួន​នោះ​ទៀត គឺ​គ្រោង​នឹង​ធ្វើឲ្យ​កម្មវិធី​ផ្តល់​ឈាម​នេះ មាន​ទ្រង់ទ្រាយ​កាន់តែ​ធំ សម្រាប់​ឆ្នាំ​បន្ត​បន្ទាប់​ទៀត។
លោក សំរិទ្ធ បាន​បញ្ជាក់​ថា៖ «នេះ​ជា​លើក​ទី ១ ហើយ ដែល​យើង​បាន​ផ្តល់​ឈាម​ឲ្យ​មជ្ឈមណ្ឌល​ជាតិ​ផ្តល់​ឈាម ហើយ​យើង​នឹង​បន្ត​ធ្វើ​ទៀត ដោយ​យើង​នឹង​ធ្វើការ​ផ្សព្វផ្សាយ​ឲ្យ​បាន​ទូលំទូលាយ​ជាង​នេះ​ទៅ​លើ​ប្រជាជន ដែល​រស់នៅ​ក្បែរ​នេះ ក៏​ដូចជា​អតិថិជន​របស់ Super Fit ឲ្យ​ចូលរួម​បរិច្ចាគ​ឈាម​ដែរ ព្រោះ​លើក​នេះ​គឺ​ក្រៅ​ពី​ក្រុម​ការងារ​របស់​ក្រុមហ៊ុន​ទាំង ៤ ក៏ឃើញ​មាន​អតិថិជន​របស់​យើង ៦ ទៅ ៧ នាក់ បាន​ចូលរួម​បរិច្ចាគ​ឈាម ជាមួយ​យើង ផងដែរ»។
យ៉ាងណា​ក៏ដោយ លោក អ៊ឹង ងួនតុលា មន្ត្រី​ផ្នែក​ទំនាក់​ទំនង​របស់​មជ្ឈមណ្ឌល​ជាតិ​ផ្តល់​ឈាម នៅ​តែ​ទទូច​សុំ​ឲ្យ​ប្រជាពលរដ្ឋ​កម្ពុជា ចូលរួម​ផ្តល់​ឈាម​ឲ្យ​បាន​ច្រើន ដើម្បី​ឆ្លើយតប​ទៅ​នឹង​ការ​កង្វះ​ឈាម សម្រាប់​ជួយ​សង្គ្រោះ​ដល់​អ្នកជំងឺ។
លោក​បាន​ប្រាប់​ថា៖ «តម្រូវការ​ឈាម​សព្វថ្ងៃ​គឺ​យើង​ត្រូវការ​ឈាម ២០០ ប្លោក​ក្នុង ១ ថ្ងៃ ដើម្បី​ជួយ​ទៅ​ដល់​អ្នកជំងឺ​រ៉ាំរ៉ៃ និង​អ្នក​គ្រោះថ្នាក់​ចរាចរណ៍ ក៏​ដូចជា​ស្ត្រី​មាន​ផ្ទៃពោះ​ជាដើម ដែល​ពួកគាត់​ត្រូវការ​ឈាម​ជា​ចាំបាច់ អ៊ីចឹង​សុំឲ្យ​ប្រជាជន​ទាំងអស់ និង​ក្រុមហ៊ុន​ជន​នានា ចូលរួម​បរិច្ចាគ​ឈាម​ឲ្យ​បាន​ច្រើន ដើម្បី​បង្កើន​បរិមាណ​នៃ​អ្នក​បរិច្ចាគ​ឈាម ព្រោះ​សព្វថ្ងៃ​ការ​បរិច្ចាគ​ឈាម​របស់​យើង នៅ​មាន​កម្រិត»។
លោក​បាន​បញ្ជាក់​ថា៖ «សព្វថ្ងៃ​នេះ យើង​ទទួល​បាន​ការបរិច្ចាគ​ឈាម​ត្រឹម ៣០ ភាគរយ​ទេ អ៊ីចឹង​យើង​ខ្ញុំ​ចង់​ឲ្យ​ពួកគាត់​ចូលរួម​បរិច្ចាគ​ឈាម​ឲ្យ​បាន​ច្រើន​ទៀត ដើម្បី​ឲ្យ​បាន​គ្រប់ ១០០ ភាគរយ ហើយ​ទាំង​អ្នកលេង​កីឡា និង​អ្នក​មិន​លេង​កីឡា អាច​មក​ផ្តល់​ឈាម​បាន​ទាំងអស់​គ្នា គឺវា​អាស្រ័យ​ទៅ​លើការ​ពិនិត្យ​សុខភាព​របស់​ក្រុម​គ្រូពេទ្យ ប៉ុន្តែ​អ្នកផ្តល់​ឈាម​ត្រូវមាន​អាយុ​ចាប់ពី ១៨ ឆ្នាំ ដល់ ៦០ ឆ្នាំ និង​មាន​ទម្ងន់​ចាប់​ពី ៤៥ គីឡូក្រាម​ឡើង»៕
=>ដកស្រង់ពី ភ្នំពេញ បុស្ដឹ៍ http://www.postkhmer.com